என் முதல் கவிதைத் தொகுப்பு

எழுதிய முதல் கவிதையே
இதழில் வெளியாகிவிட்டது.
அடுத்த கவிதையை இப்போதே
எழுதியாக வேண்டும் என்ற ஆர்வத்தில்
காகிதத்தையெடுத்துக் கவிதைக்கான தலைப்பிடுகிறேன்.
 
"எனது முதல் கவிதைத் தொகுப்பு வெளியீட்டு விழாவிற்கு
ஆயிரக்கணக்கானோர் வந்திருக்கிறார்கள்.
பாராட்டுக்கள் குவிகின்றன
அனைத்துப் புத்தகங்களும்
அப்போதே விற்றும் தீர்ந்துவிட்டன"
 
இந்தக் காட்சிகள் மாறி மாறி
என் கண் முன்னால் வந்துகொண்டிருக்க
என்னை நானே சுயத்திற்கு அழைத்து
முதல் வரியை எழுத விழைகையில்
அக்காகிதம் காற்றிற்குத் திடீரென பறந்துவிட
அதனை எட்டிப் பிடிக்க முயல்கிறேன்.
 
பொத்தென்று கட்டிலில் இருந்து உருண்டு
விழுந்தவுடன் விழித்துப் பார்க்கிறேன்
எல்லோரும் அயர்ந்து உறங்கிக் கொண்டிருக்கிறார்கள்.
இம்மாதமும் என் கவிதை வராத்தால்
படிக்காமலேயே மேஜை மீது போடப்பட்ட இதழ்
மின்விசிறிக் காற்றுக்குப் படபடத்துக் கொண்டிருக்கிறது
என் மனசு போலவே.
 
உழவன்