தொடரும்...

நிம்மதி வேண்டி அலையும்
ராமாபுரம் ரஞ்சிதா
ஆசிரமம் நோக்கிச் செல்கிறாள்
 
நோயாளிகளின் எண்ணிக்கை
உயர்த்தவேண்டி
அபிஷேகம் செய்துகொண்டிருக்கிறான்
மருத்துவமனை முதலாளி
 
பத்தே நாளில் ஆங்கிலம் பேசலாம்
என வந்த குறுஞ்செய்தியைக் கண்டு
முகவரி தேடி ஓடுகிறான் இளைஞனொருவன்
 
எந்தச் சேனலில் இருந்தும்
எந்த மாதிரியான காட்சிகளும் வரக்கூடும்
என்ற பதைபதைப்போடு
குழந்தைகளுடன்
தொலைக்காட்சி பார்த்துக்கொண்டிருக்கிறாள்
சாராசரித் தாய் ஒருத்தி
 
சிறு சிறு ஆணிகளை
சாலையின் நடுவே தூவிவிட்டு
சாலையோரமாய் தயார் நிலையிலிருக்கிறான்
பஞ்சர் பார்க்கும்
குழந்தைத் தொழிலாளியொருவன்
 
பயமாய் இருக்கிறது
ஒவ்வொரு காட்சியின் முடிவிலும்
தொடரும்... எனப் போடும்போது
பயமாகவே இருக்கிறது.
 
உழவன்